Traducción de Lenner Izquierdo Mestre, intérprete del pueblo Arhuaco de la Sierra Nevada de Santa Marta.

¿Inu ey auga no Fogafín?

Fogafín nanun nugari gugin kinki kunari jwi dumukumey uwaba unchunhuya ey aunga ni. Tanu zanamu kwasi jwi winukupasiya kwa winatanibonuya iinasin, bankuse, corporación financierase, compañías de financiamiento zakinugase kwa Sociedades Especializadas en Depósitos awiri Pagos Electrónicos (SEDPES) agwasi nakunuga’ba.

Entidad financiera jwi winchwey nakun nuga jinari nanuyay undumari nanukwey nanu neri chow azanikuya ni, ey uweri, entidad winde’rigunkuyari ayeigwi kizari nakun panuya ni, gugin amukanukwey winukunanu nari, jwi pinnazey nanuyay dumari zori awizari.

Ey uwame, Fogafín zakinugari pinna juna kunari re’gusi angweyka kununa ni, RSSF tina dumari nakun nuga’ba, jwi diwun diwun mikunikukwey nisiza na’me (azey kinki kuwarunha ukumana) awiri eygwi unzanu nungwa kutasi (regusi ukumungwa kunari).

¿Bema juna ukumuyari no?

A’nisi awuya nanuyay kunchunhey tanu kuzari institucionese’ jwi kupasi ukumun nugin Fogafínse winukunari awun nuga jinase’, ey uweri ema juna ukumun nuga ni:

• Pinnazey nari amukari institucionejina a’nise winnakun nuga jinase dumana angwasi.
• Instituciones nanun nuga’bari kunari kinki nanuyay zuein gwasi.
• Instituciones winanun nuga jinari gugin kinki liquidación kwa ipunkuya nanun nugari zasari kinki zueingwasi.
• Du kawi kuregusi Sistema del Seguro de Depósito wazori ukumungwa institucionese’ winukunari awun nuga jinase, ipunkuya, amukari awungweyka kuwarunhey sari awuya na’me.
• Nanuyay unchunhun gwa’si liquidadores kwa ipunkuya winzasari awuya jina awiri instituciones winnanun nugase’ diwun kuniku nari leyse’ ta unchunhey jwi windumusa awugwasi.
• Upaw anukunisi ungeri, Instituciones financiera neyka jinase’ kuwusana kinki unte aukwa.

¿Inu ey awga no mecanismo de recuperación?

Ema Zaku achokumuyari entidad financiera kwa jwi chwuya neyka Superintendencia Financiera de Colombia (SFC) neykase’ se kunari nakuya ey zakinuga ni, ey anuweki wa’mu isi awuyeikari eikinki kunanuya ni tanu a’zari undumari awizeikari, ey awuyeri umunte winazanuya jinase’ri re’gusi awungwa kutakuya ni: diwun nisi re’takamu, kumu a’nisi dumanun gwa’si pinna inu kwey awuyeikari, re’bási negocio ujwa entidasin kwa ungunamusa win dumanungwasi. Ema juna nisizari unzanun nuga’ba pari rigagukuya ni, iwa SFC awgari pinna juna agunchonukwey kunari umun azuna kwa administrador nikuyekukin zatakuya ey awga ni; ey awi du zari gun nanun nun’geri akey kinki nari entidase anunkuzweingwa nari kuchukumuya ni.

Ema ukumuyari tanu zanamu entidase kwungwasi ey ukumuya ni, pinnazey jwi apunsi awuya na’me, iwa Fogafín nanuyeykari jwi dumukumuyun inu kuyunun nunge’ri re’gukaki nukun gwasi entidase’ kunanuya ni, jwi du unkawi ukumuyeikari Fogafín zakinuga’ba chukumuya ni, eima jwi neykari tanibori, kwa reneykun gwasi, kawu akumukwey nikun gwasi, mikazachori tanu me’zari zori awkweykari mikurigaseykumu nari kinkuma awungwasi.

¿Inu ey awga no mecanismos de resolución?

Ingu emunuri chunun zanamu inu wamu ikumey entidad finacierase awiri SFC ne’ri bemajunari no me’zari se kunanamu kawa ni, ey anawiri izatasi na’ba ey akwey niga ana’chona awun nu’geri ingu kindi anukikawa awiri ey nigari aikunu undebona uwa ni, azi guasiri zanunno, eri eigwi nikukwey neki anukunanu nari, azey neykari yow unwesukwa anukurebori, jwi eykupari awiri tanigawi zoyana sikukin.

Ema juna nisi unzoyeri, Fogafínse’ kingwi nari unde’gusi zasari kwa kikawi nungwi awiri nanuyay kure’gawi unchunhun gwa’si, entidad Fondo na´ba winanisi winzoya jinase, ey awi nungwari kuwarunhey awiri bema juna resolución awga igawi nikukwey niko kuzanungwasuya:

Activo awiri Asunción de Pasivo – CAAP asari zoya

Emi na’bari, Fogafínse’ri du a’zarunhey activo undumari aykunu undegawi zweikwey nin’geri wamíkumu nungwasi awiri jwi du unkawi pinnazey nari kwun nuga entidase winchuey zwein nuga kwa crédito neki kwasi winzori.

Banco puente za’kinuga

Fogofínse crédito za’kinuga kwasana ey zakinuga ní activo (créditos principalmente) agwakun nuga awiri pasivos (ahorros del público) entidad financiera jwi chwuya resolución ibori una, tanu a’zari activo sanukwey awiri asunción de pasivos (CAAP) kunanungwasi, emunuri nunnay jwi dumanukwey niku nungeri kuzari bunna crédito mercaduse’ dumari kinki nukun gwasi.

Seguro de Depósitos za’kinuga

Korombiano jina jwi du winunkawi zoyari ku’chuya ey zakinuga ni, ey winisi zoya jinari entidase’ $50 millones kwa asewa uga millón nanukin jwin ka’chonun gwa’suya ey zakinuga ni.

Ema juna mika’chóri nanukwari, jwi du winawuya jinarise’ (in’gweti kwa juridiku) zun kunikun nuga ey auga ni, azi nikámu neki winukáu nari, ayei kawi kuwarunhakumana gun ne’ri a´chona zun uwa ni manunka ey u zun kuyunkinki, zasanamu káu nari.

Seguro de Depósitos de Fogafín wínchuya jinari ema jina wineika ní:

• Cuentas de ahorro zá’kinuga
• Cuentas corrientes zá’kinuga
• Certificados de Depósitos a Término -CDT- zá’kinuga
• Cuentas de ahorro especial zá’kinuga
• Bonos hipotecarios zá’kinuga
• Depósitos especiales zá’kinuga

Jwi ahorro neyka du unkumuyari azagukwey káu no mezanungwasiri, umungwi extractuse' chonu nari emitá seķunun ú ey seyu kuchunko mezanungwasi.

Ayeigwi publicidad jwi du ukumuya chuzunhakumuyaba tá chukwey nani kwa ingweti página web entidase' winukunari uwa'ba